Afrekshópur DSÍ

9. febrúar, 2009

Helgin var góð og Íslandsmeistaramótið var flott. Uppsetningin var til fyrirmyndar og fær Dansíþróttafélag Hafnarfjarðar stóran plús fyrir að leggja til kastara til að hafa umhverfis gólfið.

Keppni í Unglingaflokkum F og Ungmennaflokkum F var góð, en hún hefur líka verið það síðustu ár. Það sem er merkilegast við helgina var keppni í Fullorðinsflokkunum F. Það þarf að fara mörg ár aftur í tímann til að sjá jafn mikinn fjölda keppenda í þessum flokkum. Þetta þýðir bara eitt: Íslenskar keppnir eru orðnar sterkari. Enda sést það á úrslitunum.

Þetta gefur okkur tækifæri á að gera flottar breytingar! Styrkja stuðningin sem er á bak við þessa flokka. Afrekshópsverkefni DSÍ frá því í haust var glæsilegt, og núna er kominn grundvöllur til að styrkja það starf enn frekar. Það hefur nefnilega verið mikið brottfall hjá íslenskum dönsurum í þessum flokki hingað til.

DSÍ og dansfélögin þurfa að sameinast í því að halda vel utan um þennan hóp. Þau skref sem þarf að stíga fyrir þennan hóp dansara á Íslandi eru til dæmis:

  • Opnar æfingar einu sinni í mánuði
  • Sameiginlegar þrekæfingar undir handleiðslu þeirra sem vit hafa á þrekþjálfun
  • Hópefli til að þétta og styrkja íslenska hópinn

Allt eru þetta einfaldir hlutir sem þurfa ekki að kosta mikið ef allir leggjast á eitt, en allt hlutir sem geta skipt sköpum í því að styrkja danspörin sem keppa í efsta styrkleikaflokki.